nga kombtarja shqiptare

Shtegtimi i kombëtares së Shqipërisë në drejtim të fatit në stadiumin "Loro Boriçi" ka dështuar me turp. Dje, kuqezinjtë e trajnerit Oto Bariç kanë humbur në një mënyrë shembullore ndaj një skuadre pa shumë pretendime, si ajo e Maqedonisë. Prognoza e këtij takimi ishte shumë optimiste, madje trajneri në moshë të thyer i kombëtares sonë, Bariç, e paralajmëronte nxënësin e tij, Sreçko Katanec, se do ta mundte me një rezultat të pastër 2-0. Por do të ishte fusha e stadiumit "Loro Boriçi" ajo që do ta përmbyste fallin e kroatit 74-vjeçar, pasi maqedonasit fituan mjaftueshëm 1-0. Trajneri kuqezi kishte shpallur me të madhe aksiomën e tij për një rinovim të ekipit kombëtar dhe në këtë ndeshje pritej që të fillonte revolucioni i ekipit. Në funksion të kësaj fushate stafi i kombëtares organizoi në Turqi nga 20-29 janar një grumbullim, nga i cili mund të merrnim emrat e parë për rinovimin e kësaj skuadre.
Ndeshja e djeshme midis Shqipërisë dhe Maqedonisë tregoi fytyrën e vërtetë të kësaj fushate që ka nisur trajneri Oto Bariç, nismë e cila shkon paralelisht me fushatën zgjedhore që po zhvillohet në mbarë vendin tonë. Pra, premtimet e kroatit 74-vjeçar nuk kanë asnjë dallim nga ato të politikanëve që hedhin deklarata bombastike vetëm e vetëm për t'u bërë interesantë në publik. Natyrshëm lind pyetja nëse i vlejti ndeshja e djeshme e kombëtares sonë të ardhmes dhe planit të revolucionarizimit të ekipit. Përgjigjen e kësaj pyetjeje mund ta japë çdo shqiptar që ka pasur dje mundësi për ta parë poshtërimin e kombëtares së tij. Karakteri dhe misioni i ndeshjeve miqësore nuk është arritja medoemos e rezultatit, por përshtatja dhe eksperimentimi i skemave dhe lojtarëve të rinj. Ndërsa dje trajneri i kuqezinjve ka dështuar totalisht në çdo aspekt. Niveli i kombëtares sonë i shkonte për shtat kohës së ftohtë që mbizotëronte në stadiumin "Loro Boriçi". Të gjithë dashamirësit e ekipit kombëtar prisnin që nga takimi me Maqedoninë të gjenin krenarinë kombëtare dhe jo të nëpërkëmbeshin në atë farë mënyre. Pra dje, eksperimenti i vetëm që pamë në fushë ishte se si mund të dështosh në mënyrë të organizuar. Në pjesën e parë të takimit kombëtarja jonë pothuajse nuk ekzistonte. Kuqezinjtë e repartit të mesfushës nuk ishin të zot që të ndërtonin një aksion të thjeshtë në drejtim të portës mike. Mbrojtja edhe në këtë takim vazhdoi rrugën e saj drejt regresit, pasi portieri Arian Beqaj ishte në mëshirë të fatit, sepse për ato që kishte përpara është më mirë të thuhet se ishte vetëm. Sulmuesit kuqezi nuk u panë në asnjë moment, pasi u mungonte edhe mbështetja nga mesfushorët. Humbja e djeshme u paralajmërua që nga njëmbëdhjetëshi që nisi takimin, pasi aty nuk nuk shikohej ndonjë rinovim, madje mosha e kombëtares sonë i ngjason ekipit të Milanit, i cili rreshton në vijën mbrojtëse katër lojtarë që kapin 147 vite. Pra, megjithëse trajneri Oto Bariç kishte shpallur nismën e rinovimit, përsëri edhe në një ndeshje miqësore nuk mundi të shkëputej nga "kockat e vjetra". Pjesa e dytë ishte diçka më pozitive për ekipin tonë, por përsëri skuadra nuk e gjeti rrugën e finalizimit. Ndryshimet që ndodhën në repartin e mesfushës dhe të sulmit sikur i dhanë një dinamikë lojës, por gjithçka ngeli në kuadrin e individualitetit, pasi harmonizimi midis reparteve dhe lojtarëve pothuajse ishte i padukshëm. Megjithëse prej kohësh në vijën mbrojtëse kombëtarja jonë është ku thërret kiameti, pasi edhe dje në rastin e golit mbrojtësit morën rolin e vëzhguesit, përsëri nuk shikojmë ndonjë alternativë shpresëdhënëse. Me sa duket, kroati është dorëzuar në këtë sektor, pasi nuk ka alternativa, pasi edhe dje reparti mbrojtës mbeti i pazëvendësueshëm për plot 90 minuta. Humbja e djeshme me Maqedoninë është një kambanë e madhe alarmi në veshët e trajnerit Oto Bariç, por me moshën që ka nuk mund ta shqetësojnë, pasi po nuk e shkunde nuk merr vesh. Ndaj Maqedonisë pritej që të shikoheshin hapat e parë të rinovimit, por kjo nuk ndodhi, ndërsa situata u përkeqësua më tepër, pasi ndeshja me Slloveninë është në derë dhe me punën që po kryhet kemi pak shanse që më 24 mars Shqipëria të paraqesë një imazh tjetër nga ai i "Loro Boriçit". Me ardhjen e Oto Bariçit në krye të kombëtares sonë u tha që kroati është zgjedhja e duhur për të ngritur një përfaqësuese dinjitoze. Por realiteti dhe rendimenti i punës së Bariçit është shumë i ulët, pasi në pesë takime kroati ka arritur të marrë 1 fitore (me San-Marinon), 1 barazim dhe 3 humbje. Pra, starti i kroatit është shumë i ulët dhe, me sa duket, shpenzimet po shkojnë dëm, sepse aktuali nuk mund të kapë as paraardhësin, jo më ta përmirësojë. Me humbjen e djeshme, kombëtarja e përbalti edhe stadiumin "Loro Boriçi", i cili duhet të mbesë nostalgjik i asaj fitoreje të largët 3-1 me Rusinë. Nga përballja me Maqedoninë, e vetmja shenjë pozitive nga ekipi ynë ishte paraqitja e portierit Arian Beqja si dhe guximi i të riut Jetmir Hyka, i cili për aq minuta që luajti u mundua të japë diçka. Nga takimi i djeshëm midis Shqipërisë dhe Maqedonisë është lëshuar sinjali "SOS" për të shpëtuar "anijen" kuqezi.

albania e mir e mir po spo perparon :S:S